Mama guru,mama guru,ada apa pande alame ana tarus biking kaget mama,mama guru beta mau tanya sadiki bisa kaseng mama?pande mau tanya apa? Itu yang merah merah di mama pung mulu itu dia nama apa mama guru? Ini akang nama lipstick pande,jawab mama guru deng senyum,dong biking akang dari pinang lai ka mama guru?hahaha,bukang pande,lipstick ini pung bahan dasar dari minya jarak atau lilin mado tarus dong kasih warna akang.Dari mana mama guru tau? Dari buku pande.Ouu bagimana pande bisa baca buku,kalo pande seng kanal hurup ka itu biar satu lai mama guru.Itulah mama guru subilang par tua kalo pande harus skola biar pande bisa tau tulis deng baca.Eh itu gambar apa mama guru?itu gambar pesawat pande,akang pung guna par apa mama?kalo ada pesawat di sini berarti pande bisa pi ka Ambon abis minum teh pagi deng pulang sebelum makang siang.Dia seperti burung besi mama guru e,kata pande herang herang.Coba kalo pande bisa biking satu,pasti pande bisa bawa oyang pi barobat di jekarda,bukan jekarda pande tapi Jakarta.Mama guru tunggu sini beta mau pi bilang tua tua samua,kalo ana ana gunung jua harus isikola,biar katong jua bisa pintar labe dari ana ana ambon atau ana ana Jakarta,ucap anak umur 9 taong ini.Ibu Randa hanya senyum sa baharap pande bisa rayu orang tatuwa par ana ana disitu samua skola.
Tatuwa, beta deng tamang tamang harus skola,mama guru bilang kalau katong skola,katong bisa tau biking burung besi,jadi kalau tatuwa saki seng perlu dapa tanam ditanah kaya oyang.Pande Alam anak kacil se tau apa?deng parampuang Ambon tu su kasi maso setang apa di se kapala,beta seng mau tau tatuwa pokoknya beta mau skola di mama guru.Pande lalu lari kasi tinggal kapala suku yang badiri pono emosi
He guru Ambon,kaluar kamari,nanti beta panggal se kapala alus aluse,se mau rubah katong pung adat?disini ana ana seng boleh skola!Ampong tatuwa,ibu Randa kaluar langsung kasi hormat,b minta maaf jua,beta seng ada niat par rubah tatuwa dong pung adat,beta cuma mau ana ana ni skola seperti ana ana Ambon sana,tapi kalau memang beta biking sabarang,beta rela tatuwa samua potong beta kapala par nengkeke,tapi tolong kasi beta satu kesempatan jua tatuwa.Pas dengar ibu Randa pung bicara,kapala jojaro langsung angka suara,katong kasi waktu 3 purnama saja Ambon,jang ale sabarang nanti parang ni kanal se pung batang leher.somba upu
Mama guru kumpul ana ana ada pande,papopol,lepa,boro,mao,pinang,sira,mara deng nari dong samua ada 10 orang.Ana ana bantu mama biking walang par katong balajar diakang,mama guru balajar di bawa pohong jua,labe bagus,iyo papopol,tapi seng tarus katong balajar di bawa pohong,kalau ujang turung se mau tetap balajar disana?cari bibir biru ka'apa jawab pande,yang pande bilang itu batul papo,katong seng slamanya balajar di bawa pohong atau di walang,katong jua bisa balajar di goa,pante atau disana kata ibu dara lantas tunju ka arah gunung,ternyata mama guru isikola tu baguse mama guru?apalagi kalau katong bisa pi ka atas sana,pigi ka langit mama,memang bisa?bisa,katong bisa pi ka langit,lia bulan deng mars,lia awan deng tampa laeng disana.
Seng rasa sudah 3 purnama lewat,mama guru dapa suru hadap tatuwa.Somba Upu,duduklah Ambon.Beta sulia anana pung perkembangan,seng ada kemajuan paskali,yang ada cuma anana tamba malawang.Se seng berhasil Ambon jadi mari toma iko se pung janji jadi korban par nengkeke.Mama guru lalu dapa arak ka rumah adat,pas par mau kanal mama guru pung leher,dapa dengar suara,stop!mama guru seng akan pernah jadi korban tatuwa,lia disana tatuwa,itu kincir air yang mama guru ajar akang par katong,supaya katong seng kurang deng aer,tambah ini tatuwa,mahkota raja dari mutiara yang katong piara akang slama ini,samua tatuwa yang ada disitu kaget dengar pande deng papopol bicara,mama guru hanya senyum tiba tiba tatuwa bataria kuat kuat deng lari kaluar seperti orang gila,coba tolong tahang tatuwa kapala ngungare,mama guru langsung giling daong daong la kasi minum par tatuwa,tapi sayang nyawa tatuwa seng dapa tolong.Ternyata banya yang saki macam tatuwa,mama guru tau kalau kampong tu kana wabah malaria,mama guru biking obat pencegah dari daong daong par samua orang minom.
Malam itu jua mama guru pingsan,dingin deng pucat skali karna lalah.Samua orang datang par lia,pande lari ka gunung par kirim berita sos,mama sabar pande su kirim berita minta bantuan safiki lai bantuan datang mama guru,iyo pande tapi pande harus biking pesawat biar katong bisa ronda ka Ambon atau kalangit. Kapala Jojaro beta kondisi seng bagus,tolong lia pande deng anana jua.Pande,Papo mama guru lalah mama guru tutup mata sadiki do e,mama guru buka mata do katong samua butuh mama guru disini.Itu Tiga puluh
Taong lalu.Carita ditanah Lease,Pande skarng jadi ahli pesawat termuda di dunia mama seperti mimpi yang mama ajar akang par pande.Sepanjang hidup dunia ini seng akang pernah lupa mama guru,seperti pande mama,sakarang ni mama guru,burung besi su jadi siap par antar mama guru ka dokter paleng pintar di dunia,biar mama guru masih disini ajar pande pung ana cucu,ajar dong par bermimpi,ajar dong jang putus asa,ajar dong tantang dunia,ajar dong par berjuang,ajar dong tentang pengabdian,ajar dong arti kemanusiaan
Tidak ada komentar:
Posting Komentar